苦瓜总归是苦嗰

苦瓜总归是苦嗰飞入寻常百姓家
来源:新民晚报   作者:沈一珠   2019-09-01 16:00:30

讲到苦瓜,阿拉小辰光一直叫伊结铃子,后来再晓得,其实伊应该是锦荔枝。

埃歇辰光,阿拉屋里就拿伊种辣坏脱个面盆里,横过来直过去撑几根竹头搭只架子,伊就一路爬了长大;看伊结出一只小果子,慢慢交长到小人拳头大小,两头尖尖,表面疙疙瘩瘩。先是绿颜色嗰,等伊一点点变成金黄颜色了,就可以剥开来吃里向个核了:血血红,水漉漉,甜咪咪,阿拉当伊是果肉。对了,吃口跟荔枝肉还真个有点像。

果肉吃清爽以后,露出来个是一小粒籽,米白色,扁扁嗰,呈勿规则形状,看上去蛮讨人欢喜。汏清爽,沥干,总想囥到第二年春天再种,只勿过辰光一长,老是忘记脱。

现在晓得了,锦荔枝就是苦瓜,只不过,吃个是外头个瓜肉,而且斜气苦。所以,总会想办法拿伊个苦味道去脱一点。其实根本做勿到,也呒么必要,因为,苦瓜就应该是苦嗰。

当然,苦得来叫人打恶心也勿来三,搿就要烧个辰光增加点其他味道。比方:用盐腌一腌。清炒苦瓜,切片后先用盐擦一擦,汏清爽仔,开油镬大火热炒几分钟,加点糖盐调味,就好盛出来吃了。再比方:用蜂蜜蜜一蜜。苦瓜切成片用开水焯一焯,冷开水过一过,淋稍许蜂蜜上去,冰箱里冰一个钟头左右,就好拿出来吃了。还有用咸蛋黄厚厚交裹一层摆油镬里炒嗰,也有塞肉或者是塞南瓜蓉进去蒸嗰。

写道搿搭,辣末生头就想到“苦中作乐”迭个词了:像过日脚一样,碰着心里苦个辰光,也要用开心事体挡一挡,解一解。(沈一珠)

编辑:史佳林

看评论

推荐阅读