上海闲话 | 结件绒线衫挡挡寒

上海闲话 | 结件绒线衫挡挡寒飞入寻常百姓家
来源:新民晚报   作者:沈一珠   2019-11-17 13:57:59

立冬已过,天气越来越冷。按照古人个讲法,立冬节气分成三候,一候水始冰,二候地始冻,三候雉入大水为蜃。啥意思呢?就是讲之后个十五天里向,天气个变化可以用眼睛看得出来:先是水开始结冰;然后,烂泥逐渐冻得硬邦邦;再进一步,羽毛斑斓个锦鸡潜入水中,化身为一种叫大蛤个水产品。

锦鸡变成大蛤?搿个脑洞也是相当大嗰。勿过,辣当时个条件下头,古代人对大自然里交关物事呒没办法解释:为啥立冬以后野地里锦鸡之类个大鸟越来越少,海边却可以看到外壳与锦鸡个线条和颜色相似个大蛤,所以就想当然认为锦鸡变大蛤了。就像古代人难以想象,明明已经立冬了,为啥现在马路浪还可以看见有交关人穿仔单衣单裤,手里拿仔只冰淇淋球边走边吃,好像一点勿觉得冷——人个身体素质越来越好了,地球也越来越暖了。

总记得,阿拉小辰光,从秋风扫落叶开始,姆妈就开始结绒线衫、绒线裤了。夜里向天气冷,有辰光邻居道里,一道孵辣灶披间里结绒线。煤球炉已经封脱了,一只铜壶装满水,炖辣炉子上头;偶然,会有热气拿铜壶盖头顶得噗落噗落跳。

结绒线是仔细生活,茄茄山河,一勿当心会漏针错针。顶怕等发现辰光,已经结仔两三寸了,乃末好,结结一大歇,拆拆一歇歇。有辰光,也会因为勿称心,拆光仔重新来过。小人长得快,一件绒线衫会存心结得稍许大一眼。等一件绒线衫短了,袖口磨毛了,就要拆脱重新再结了。

辣绒线个拆拆结结之间,小人长大了,大人变老了,交关物事也变得物是人非了。

立冬以后,总归是冷天了,早晚加件衣裳。假使能有一件姆妈结个绒线衫,应该是顶暖热嗰。(沈一珠 图文)

编辑:史佳林

看评论

推荐阅读