新民客户端

飞入寻常百姓家

下载APP

音频丨上海人走过的桥

音频丨上海人走过的桥 飞入寻常百姓家
来源:新民晚报   作者:王蔚   2022-07-23 11:11:00

有句老古闲话讲:“我走过呃桥,比侬吃过呃盐还多。”从前一直认为格是夸张,但自从我到上海郊区角角落落里去看一座座古代、近代留下来呃石头桥,我终于相信了这句闲话。

我采访了上海交通大学建筑文化遗产保护国际研究中心主任曹永康,教授对我讲,上海现存古桥617座,其中拥有文物身份的古桥有459座。从数量浪看,勒明清时期到达顶峰,民国以后逐渐减少。古桥主要集中勒郊区,格反映了上海地区城市化发展的空间顺序。再从地域分布来看,拥有文物古桥最多的分别是奉贤区,有133座,青浦区有80座。

近腔上海天气热煞人。我开了车子去看桥。有几趟是老清老早出门,跑到金山、青浦去。还有几趟是等到太阳快要落山呃辰光,去嘉定南翔、闵行诸翟等比较近呃地方。

几个青浦朋友听到我要看桥,拼命叫我去看伊拉金泽古镇郎呃几座古桥,我就勿去。这几座桥,我廿几年前就去看过了。还有松江朋友也喊我去方塔去看一座邪气有名呃古桥,我也没去。为啥?因为格些古桥太有名气了,百度里随便搜搜就有一堆资料。我决定,太热门呃桥,格趟就勿去看了。

我跑到金山漕泾镇金光村去看济渡桥,格是上海浦南地区现在仅有的七孔桥。桥保留得蛮好。听村里呃老伯伯讲,老底子村里通到外面只有过桥一条路,村里厢绕七绕八,勿是当地人根本绕勿出来。有一天,廿几个日本鬼子从桥郎一路往村里冲,一人手里拿一把洋枪,耀武扬威得勿得了,结果,过了桥就再也绕勿出来了,被阿拉英勇呃中国军民统统打死了村里厢。

图为济渡桥。摄影:王蔚

我还跑到闵行区华漕镇诸翟村去看鹤龙桥,是清朝康熙四十五年(1706年)造呃。前几年因为河道整治,被移动了50米,通行作用已经没啥了,主要是作为村里呃一个景观。我跑到村里,正好是吃好夜饭辰光,村里厢呃人侪勒乘风凉。现存勒新鹤龙桥旁边造了一座长廊,老伯伯老妈妈侪坐勒嗨扇扇扇子嘎嘎山胡。格呃村里交关人姓侯,因为明末抗清英雄侯峒曾就出生了此地。一位60多岁的老伯伯看我是新民晚报记者,就跑过来要跟我讲闲话。伊讲,听伊呃阿奶讲,乾隆皇帝下江南呃辰光来过诸翟,还走过格座桥。当乾隆皇帝路过伊拉屋里门口呃辰光,听到后头有个女人一直勒哭,伤心得勿得了。乾隆皇帝停下了脚步,叫手下头呃人去打听。倷晓得结果哪能伐?我一边勒听一边勒想,我住勒长宁区新泾镇,离华漕大概十几公里路,勿晓得当年乾隆皇帝到阿拉小区附近兜过伐。可惜伊格辰光呒没嘀嘀,否则,乾隆皇帝作兴也会得拦部差头到长宁区来白相相伐。格位老伯伯越讲越起劲,伊拉老婆还叫我到伊拉曾经的老宅去看乾隆皇帝留下墨宝呃牌坊。因为有皇帝题过字呃牌坊留了下来,伊拉屋里被动迁了,但老夫妻两个人每天要回村里看看。我没问伊拉天天回来是要看桥,还是看牌坊。我刚想问动迁拿到几套房子、几钿钞票,突然有人喊我,讲我停了桥旁边呃车子堵牢人家路了,采访只好到此结束。

图为鹤龙桥。摄影:王蔚

上海600多座古桥,我大概前前后后看了十五六座桥。有一句讲一句,上海人对古迹文物保护呃意识还是蛮强呃。格些古桥已经成为阿拉上海人呃历史见证和文化标记。(讲述人:王蔚)

编辑:陈莉
举报

看评论

推荐阅读