微信扫码看视频听钱程沪语朗读

◆周钰栋

天冷了，走过街头，每当冷风里飘来烘山芋个甜香，我个脚步就自然而然个放慢了。西北风一吹，山芋里向个淀粉转成糖分，再经过炭火一烤，香甜个汁水就从烤得干绷绷个外皮里渗出来，迭个甜香浓得化勿开，对我来讲就是一种难以拒绝个诱惑。

讲到诱惑，就想起小辰光个事体了。每天学堂放学，侪是外公来接我，有一年冬天，伊像变戏法一样，摸出两只烘山芋拨我吃。搿种香甜味道让我馋吐水溚溚渧，两三口就到肚皮里向去了。吃好还要问外公要，外公两手一摊，笑眯眯讲：“呒没了呀，要吃，等明朝噢。”

埃歇辰光，屋里向烧饭用个侪是煤球炉，生炉子要费勿少工夫，所以家家户户早浪向点着炉子烧好早饭，火侪不灭脱个，而是拿炉门封起来，勿让空气进去。搿能一来，炉子里缺氧，火就半明半暗地闷辣海，烧中饭、夜饭个辰光，打开炉门通通风，火就旺起来了。外公吃好中饭，封炉子之前，拿两只小山芋摆到煤球炉底下，靠炉子个余热慢慢烘。等我放学，香喷喷个烘山芋正好出炉。

埃歇辰光物资供应紧张，粮食侪是配给个。阿拉搿帮小囡正辣辣长身体，饭量大，爷娘为了让阿拉吃饱动了勿少脑筋。吃外公个烘山芋，成了我少有个开心辰光。后来我到农村当知青，也常常趁烧饭个辰光，拿山芋塞到灶膛旁边，等饭烧好，山芋也烘得香喷喷。闻到灶膛里飘出来个甜香，疲惫个身体也觉着轻松了勿少。

后来还听说了一个搭烘山芋有关个故事，据说乾隆皇帝曾经带仔纪昀到山东济宁微服私访，夜里去城西关帝庙逛庙会，老远就闻到了一股甜香。顺着香味寻过去，看到了一个老人家辣辣摆摊头卖烘山芋。乾隆叫纪昀去买一只来尝尝，一吃么，顿觉糯软香甜，于是龙颜大悦，连牢好几天派人去搿只摊头浪买烘山芋。呒没想到吃了几天，伊久治不愈个便秘居然好了！乾隆开心得勿得了，就讲迭个烘山芋“功能胜于人参”。迭个故事真假难辨，但山芋个药用价值，老早就辣辣中医典籍里有记载了。

可惜小辰光冬天里辣辣路边看到个烘山芋摊头现在寻大勿着了。大概就是因为烘山芋辣辣我个记忆里有过难忘个美好，每到冬天，我个心里就会得有一种淡淡个期盼，期盼搭伊不期而遇。

前两日夜里向路过高架下头，突然闻到一股浓浓个烘山芋香。顺着香味寻过去，是一家夜里仍旧开门个小店。我毫不犹疑大步上前，扫码付账，拿起一只烫手山芋，一边剥一边啃，嘴巴旁边侪是山芋皮个焦黑，活脱脱长了一圈大胡子……搿种幸福或许早已根植于我个味觉，无法抗拒。生活嘛，也因为搿点烟火气，变得格外有味道了。