◆ 沈一珠

笋薯，买伊个辰光，就是陌生个，从来呒没吃过，甚至从来呒没听到过。买菜App上头介绍，一拍一煎，就好。真正是一记头就拨伊噱过去——向来就欢喜简单做法个吃食，像干煎带鱼，油锅里炸到外焦里嫩，搛出来就吃，一边“嘶哈嘶哈”怕烫，一边享受迭种勿加任何作料个鲜香；又或者搿两天个矮脚青菜，汤烧好饭盛好，再开油镬，汏好个菜倒下去煸一煸，合好咸淡盖镬盖烧三四分钟，盛出来就吃，味道斜气赞！

讲回笋薯。拿到手里猛一看还以为是一盒生姜，拆开细看，蛮细巧，外头裹仔一层衣，有点像竹笋壳个纹路，一层层剥开，质地近似于从前吃过个长成一大只圆疙瘩个凉薯。

就用顶简单个办法。壳剥好，再刨脱一层，对剖，拍松——试下来，还是斜切成厚片比较好，因为笋薯肉里茎茎拉拉纤维斜气丰富，高温下也勿容易熔断，切断后口感就好交关——两面煎到金黄，撒点细盐，欢喜口感复杂点个，可以淋点亚麻籽芝麻盐，软糯当中带点松脆；空口吃，或者可以来点小酒过过。

有交关人欢喜蘸辣椒粉，就恐怕食材有辰光会委屈到哭，明明还有交关细细叫个滋味，拨辣豁豁压牢……

初尝之下，意犹未尽。查了一查，讲是广州人欢喜吃笋薯，习惯拿伊炖汤。比方说，天冷了，可以炖只养生老鸭汤。鸭子汏清爽，斩大件，焯水备用，笋薯切厚片备用；镬子里加足水、倒进鸭块、葱、姜，大火烧开，小火炖40分钟左右，再摆笋薯炖半个钟头左右，调好咸淡就可以了；再比方讲，斩碎，蒸肉饼子，老爽口也老下饭。

吃过尝过，又寻着一只故事。讲笋薯个原产地辣南美洲，明清辰光传到中国，作为新鲜物事，一般食谱里寻不着伊个踪迹，倒是辣《西游记》第二十四回“万寿山大仙留友，五庄观行者偷果”里昙花一现——

五庄观主镇元子得知故人唐僧到此，特地让清风明月两个徒弟好好招待。推门走进菜园个孙悟空，一见满园蔬菜瓜果，秒变初入大观园个刘姥姥，“布种瓜瓠（hu）茭白，葱蒜芫荽（yan sui）韭薤（xie）。窝蕖童蒿苦藚，葫芦茄子须栽……”

悟空笑道：伊也是个自种自吃个道士。只可惜悟空与观主志勿同道勿和，伊光顾着去偷那个可以让人长不老个人参娃娃了。可惜了。