文并图\沈一珠

坐辣电脑前跟DeepSeek聊，从节气聊到美食、弄堂里晒个酱肉以及诗，聊到兴头浪，DeepSeek即兴AI了打油诗一首，居然还特别提醒：最后一句是特别为侬加个上海特色；咦，伊哪能猜到是辣跟上海人茄山河？

小诗有点七拼八凑，勿过，呒没关系，只要有意思就好：

窗棂轻叩是谁呀？

原来风捎来

半勺月光，三粒糖霜

偷藏进未写完的诗行

瓦罐咕嘟煮着陈年故事

酱油肉香爬上晒衣绳

打了个转——

忽然撞见

枝头最后一片银杏

正踮脚张望

顶欢喜“酱油肉香爬上晒衣绳”迭句，因为搿是小辰光屋里常常有个风景，“冬腊风腌，蓄以御冬”，苏浙沪一带有迭个传统，小寒开始腌鱼酱肉，准备过冬。只勿过，现在老少有人亲自去做迭桩事体了；手机下单，快递到家，多少便当啦。齐巧，看到朋友圈里老同学晓航晒个内容：

“勿知勿觉就喜欢上吃酱货了，这几年一直自己做。冬至那天去精选了三十多斤五花肉，八只木陀鸭，清理干净，喷上高度白酒，沥一晚上。然后，将酱油烧开，冷却后，肉和鸭分别浸入，50小时左右拎出，晒三天太阳。今朝就可以完工，明天大快朵颐。”

看到酱油肉香爬上老同学家个晒衣绳，馋唾水溚溚渧之余，莫名生出一份温暖。作为一个事业有成个律师，晓航平常顶欢喜个就是买汏烧，朋友小聚，常常也是伊下厨掌勺。想想，一个人无论贫穷还是富足，只要始终保持一份为家人烧烧吃吃个热情，日脚总是超级有爱个。

酱油肉，上海人叫伊酱肉，顶简单个吃法是清蒸；晒干，特别是风里吹了一段辰光，酱肉会有点硬，酱肉蒸之前可以摆清水或者淘米水里泡一个钟头，沥干后，加点黄酒、葱、姜祛腥提香，加点糖淡盐吊鲜，隔水蒸半个钟头，出锅冷却后切薄片，精肉红堂堂，油脂亮晶晶，是从前年菜个首选。

酱肉顶好吃个做法是，浸后汏清爽，切片，饭烧到一半辰光，肉铺上去，饭烧好，莹白个米搭配酱红个肉，饭香肉香也斜气合拍，一碗饭平平常常，却大美大补。